ருஷ்ய சிறுவர் இலக்கியம்!

“உழைக்கும் கைகளே! அதை உருவாக்கும் கைகளே!”

-மெக்கானிக் மாணிக்கம் (படம் – சேரன் பாண்டியன்)

வணக்கம்,

தமிழ் கூறும் காமிக்ஸ் நல்லுலகிற்கு அடியேனின் சற்றே தாமதமான உழைப்பாளர் தின நல்வாழ்த்துக்கள்! மே தினம் என்றதுமே நம் நினைவுக்கு வருவது பொதுவுடமையும், சமவுடைமையும் அச்சிந்தனைகளை உலகில் விதைத்த போராளிப் பேரறிஞர் கார்ல் மார்க்ஸ்-ம்,  அவை விளைந்த நன்னிலமான ருஷ்ய நாடும்தான்!

ஆனால் ருஷ்ய நாட்டிலிருந்து வரும் படைப்புகள் அனைத்தும் அரசியல் சார்ந்தவையே என்கின்ற தவறான கருத்து நமது மக்களிடையே நிலவி வருகிறது! உலகப் புகழ் பெற்ற பல அரிய படைப்பாளிகளை இலக்கியத்திலும், திரைத்துறையிலும் வழங்கியுள்ளது அம்மாபெரும் நாடு!

அதே போல் சிறுவர் இலக்கியத்திலும் பல சிறந்த படிப்புகளை அந்நாட்டவர் நமக்கு வழங்கியுள்ளனர்! இந்த மே தினத்தில் எனது சிற்றிளம் பருவத்தினை வியாபித்திருந்த அந்த உலகப்புகழ் பெற்ற சிறுவர் இலக்கியங்களில் சிலவற்றை இங்கே உங்களுக்கு வழங்குவதில் பெருமை கொள்கிறேன்!

அறியாதோற்கு ஒரு சிறு அறிமுகமாகவும், அறிந்தோற்கு அற்புதக் காலப்பயணமாகவும் இப்பதிவு அமைந்திட்டால் நான் மிகவும் மகிழ்ச்சி கொள்வேன்!

இப்பதிவை உங்கள் வசதிக்காக கதாசிரியர்களைக் கொண்டு பகுத்துள்ளேன்! கதைகளின் பெயர்களில் உள்ள சுட்டிகளை ‘க்ளிக்’கினால் அக்கதையை இனையத்தில் படிக்க இயலும்! படித்து மகிழுங்கள்!

லியோ டால்ஸ்டாய் (LEO TOLSTOY):

அன்னா கரெனினா, போரும் அமைதியும் (இவற்றையெல்லாம் நான் படித்ததில்லை) போன்ற உலகமகாக் காவியங்களை இயற்றிய லேவ் நிக்கலாயெவிச் தல்ஸ்தோய் பிரபு அவர்கள் சிறுவர்களுக்கெனப் பிரத்தியேகமாகப் பல சிறுகதைகளைப் படைத்துள்ளார். அவற்றின் ஒரு தொகுப்பு நான் படித்த ரசித்த முதல் புத்தகங்களில் ஒன்று!

பொய்யன் (THE BOY WHO CRIED WOLF), இரண்டு நண்பர்கள் (TWO FRIENDS AND THE BEAR) போன்ற ஏஸாப்-பின் நீதிக்கதைகளை தனது பாணியில் வழங்கியுள்ளார் டால்ஸ்டாய்! அதுமட்டுமல்லாது சிங்கமும் நாயும் (THE LION AND THE DOG) போன்ற பல உருக்கமான சிறுகதைகளையும் கொண்டது இந்தத் தொகுப்பு! அற்புதமான கருப்பு வெள்ளை ஓவியங்கள் புத்தகத்தின் சிறப்பை மேலும் கூட்டுகின்றன!

தமிழிலும் ஆங்கிலத்திலும் இப்புத்தகம் இந்தியாவில் வெளிவந்தது! இரண்டையுமே அடியேன் பத்திரமாக வைத்துள்ளேன் எனக் கூறிக்கொள்வதில் பெருமையடைகிறேன்!

சமீபத்தில் இந்தப் பதிவுக்காக இனையத்தில் ஆய்வு மேற்கொண்ட போது மேற்காணப்படும் புத்தகத்தின் ஆங்கிலப் பதிப்பு $10  முதல் $30 வரை விற்பனையாகி வருவது கண்டு அதிசயித்தேன்! எப்பேர்ப்பட்டதொரு பொக்கிஷத்தை நான் கையில் வைத்துள்ளேன் என அப்போதுதான் உணர்ந்தேன்!

இக்கதைகளையும் டால்ஸ்டாயின் பிற நீதிக்கதைகளையும் படிக்க இங்கே ‘க்ளிக்’கவும்! பல வழிமுறைகளிலும் படிக்க வகை செய்யப் பட்டிருக்கிறது! படித்து மகிழவும்!

டால்ஸ்டாயின் மற்ற படைப்புகளைப் படிக்க இங்கே ‘க்ளிக்’கவும்!

புத்தகம்	:	குழந்தைகளுக்கான குட்டிக்கதைகள்
ஆசிரியர்	:	லேவ் தல்ஸ்த்தோய்
பதிப்பாளர்கள்	:	முன்னேற்றப் பதிப்பகம், மாஸ்கோ (PROGRESS PUBLISHERS)
வருடம்	:	1981
ஆங்கிலத்தில்	:	ஃபெய்ன்னா க்ளகொலெவா (FAINNA GLAGOLEVA)
தமிழில்	:	பூ. சோமசுந்தரம்
ஓவியர்	:	அ. பாகோமொவ் (A.PAKHOMOV)
விற்பனையாளர்கள்	:	நியூ செஞ்சுரி புக் ஹவுஸ் பிரைவேட் லிமிடெட், சென்னை

நிக்கலாய் நோசவ் (NIKOLAI NOSOV):

ருஷ்ய நாட்டின் தலைசிறந்த சிறுவர் இலக்கிய எழுத்தாளரான நிக்கலாய் நிக்கொலெவிச் நோசவ் தனது 30 ஆண்டு கால இலக்கியப் படைப்புப் பணியில் பல்வேறு சிறுகதைகள், கதைகள் புனைந்துள்ளார்!

அழகிய கோட்டோவியங்களுடன் கூடிய விளையாட்டுப் பிள்ளைகள் தொகுப்பில் வரும் பல கதைகளில் ருஷ்யாவின் தலைசிறந்த காவியக் கவிஞராகிய அலெக்ஸாண்டர் புஷ்கின்-ன் பல கவிதைகள் மேற்கோள் காட்டப்பட்டிருக்கும்! அவற்றில் துருஷோக்கு எனும் கதையில் வரும் சில வரிகள் என் மனதில் நின்றுவிட்டன!

வெள்ளைப் பனி! அதில் வண்டியோட்டும் குடியானவன்
உள்ளக் களிப் புற்றே புதுத்தடம் பதிக்கின்றான்,
புதுப் பனியை முகரும் அவன் குதிரையும்தான்
புது முறுக்குடன் துள்ளிக் குதித்து ஓடுகிறது…

இக்கவிதை கதையில் ஒரு முக்கிய திருப்பத்தை ஏற்படுத்துகிறது என்பதே சிறப்பம்சம்!

புத்தகம்	:	விளையாட்டுப் பிள்ளைகள்
ஆசிரியர்	:	நிக்கலாய் நோசவ்
பதிப்பாளர்கள்	:	முன்னேற்றப் பதிப்பகம், மாஸ்கோ (PROGRESS PUBLISHERS)
வருடம்	:	1978
தயாரிப்பு	:	ரூபேன் வார்ஜிகுலியான்
தமிழில்	:	ருக்மணி, பூ. சோமசுந்தரம்
விற்பனையாளர்கள்	:	நியூ செஞ்சுரி புக் ஹவுஸ் பிரைவேட் லிமிடெட், சென்னை

அதே போல கற்பனையாளர்கள் கதைக்கு வரையப்பட்ட அழகிய வண்ண ஓவியங்களும் சுலபத்தில் மறக்க இயலாது! சிறுவர்களுக்கு கற்பனைவளம் எவ்வளவு இன்றியமையாததொன்று என்பதையும், கற்பனைக்கும், பொய்மைக்கும் உள்ள வேறுபாட்டினை சுட்டிக் காட்டும் விதமாகவும் அமைந்திருக்கும் இக்கதை எனது ஆல்-டைம் ஃபேவரைட்களில் ஒன்றாகும்!

புத்தகம்	:	கற்பனையாளர்கள் (STORYTELLERS)
ஆசிரியர்	:	நிக்கலாய் நோசவ்
பதிப்பாளர்கள்	:	முன்னேற்றப் பதிப்பகம், மாஸ்கோ (PROGRESS PUBLISHERS)
வருடம்	:	1982
ஆங்கிலத்தில்	:	ஃபெய்ன்னா க்ளகொலெவா (FAINNA GLAGOLEVA)
தமிழில்	:	பூ. சோமசுந்தரம்
ஓவியர்	:	இ.ஸெம்யோனவ் (I.SEMYONOV)
விற்பனையாளர்கள்	:	நியூ செஞ்சுரி புக் ஹவுஸ் பிரைவேட் லிமிடெட், சென்னை

இவரது கதைகளை இவ்விணைப்புகளில் அழகிய படங்களுடன் படித்து மகிழவும்!

• உல்லாசக் குடும்பம் (JOLLY FAMILY)
• வீட்டிலும் பள்ளியிலும் (SCHOOLBOYS)
• கோல்யா சினித்சினது நாட்குறிப்பு (KOLYA SINITSIN’S DIARY)
• துனோவும் அவனது சகாக்களும் (THE ADVENTURES OF DUNNO)
• மீஷா சமைத்த பொங்கல் (MISHKA’S PORRIDGE AND OTHER STORIES)
• VISITING GRANDPA

மூன்று தடியர்கள் (THE THREE FAT MEN) - யூரி ஒலெஷா (YURI OLESHA):

ருஷ்யப் புரட்சி வரலாற்றை சிறுவர்களுக்காக முதன்முதலாக எழுதியவர்தான் யூரி கார்லொவிச் ஒலெஷா.

1928-ல் எழுதப்பட்ட இக்கதை ருஷ்ய ஜனரஞ்சகக் கலாச்சாரத்தில் ஊறிவிட்ட ஒன்றாகும்! இக்கதையில் வரும் கதாபாத்திரங்கள் நம் நெஞ்சில் நீங்கா இடம் பிடித்துவிடும்!

இக்கதையின் பாதிப்புகள் இதற்குப் பின் வெளிவந்த பல சிறுவர் இலக்கியங்களில் காணலாம்! இக்கதையின் நாயகர்கள் பலவேறு கதைகளில் குணச்சித்திர வேடத்தில் வந்துபோவது அப்போதைய சிறுவர் இலக்கியங்களில் சகஜம்!

சர்வாதிகார ஆட்சி புரிந்து வரும் மூன்று தடியர்களை சாதாரன மக்களின் சில பிரதிநிதிகள் எவ்வாறு வெற்றி கொண்டு நாட்டுக்கும், நாட்டு மக்களுக்கும் விடுதலையளிக்கின்றனர் என்பதே கதை!

வழக்கம் போல அற்புத ஓவியங்கள் கதைக்கு மிகப்பெரும் பலம் சேர்க்கின்றன! ருஷ்ய சிறுவர் இலக்கியங்களில் இக்கதை மிகுந்த முக்கியத்துவம் வாய்ந்ததாகக் கருதப்படுகிறது!

புத்தகம்	:	மூன்று தடியர்கள்
ஆசிரியர்	:	யூரி ஒலெஷா
பதிப்பாளர்கள்	:	முன்னேற்றப் பதிப்பகம், மாஸ்கோ(PROGRESS PUBLISHERS)
வருடம்	:	1976
ஆங்கிலத்தில்	:	ஃபெய்ன்னா க்ளகொலெவா (FAINNA GLAGOLEVA)
தமிழில்	:	பூ. சோமசுந்தரம்
ஓவியர்	:	போரிஸ் கலாஷின் (B.KALAUSHIN)
விற்பனையாளர்கள்	:	நியூ செஞ்சுரி புக் ஹவுஸ் பிரைவேட் லிமிடெட், சென்னை

கதையைப் படித்து மகிழ கீழ்கண்ட இணைப்புகளை உபயோகிக்கவும்!

• மூன்று தடியர்கள் - அழகிய படங்களுடன் கதைச்சுருக்கம்
• மூன்று தடியர்கள் – முழுக்கதை டவுன்லோடு செய்ய

ருஷ்ய மற்றும் உக்ரேனிய நாடோடிக் கதைகள்:

ருஷ்ய நாட்டின் சிறுவர் இலக்கியத்தில் தேவதைக் கதைகள் (FAIRY TALES) கிடையாது! ஏனெனில் ருஷ்யாவில் தேவதைகளே (FAIRIES) கிடையாது என்ற நம்பிக்கை உண்டு! ஆகையால் அவர்களது பண்டைக் கதைகளை நாடோடிக் கதைகள் (FOLK TALES) என்றே குறிப்பிட வேண்டும்!

பேரழகி வசிலிஸா, EMELYA AND THE PIKE, THE LITTLE ROUND BUN போன்ற கதைகள் எனது ஆல்-டைம் ஃபேவரைட்களாகும்! அதிலும் BUN வடிவத்திலேயே இருக்கும் THE LITTLE ROUND BUN புத்தகம் என்னை இன்றும் உள்ளம் உவகை கொள்ள வைக்கிறது!

இதில் THE LITTLE ROUND BUN கதையின் மறுபதிப்பு ஒன்றை சமீபத்தில் கண்டேன்! ஓவியங்கள் எல்லாம் தற்காலத்திற்கேற்ப அமெரிக்க வடிவில் வந்ததைக் கண்டு மனம் நொந்தது! விற்பனைக்காக இதெல்லாம் அவசியமெனும் போதும் எங்கோ ஒரு மூலையில் மனம் இதையெல்லாம் ஏற்க மறுக்கிறது!

நாடோடிக் கதைகள் படிக்க:

• பேரழகி வசிலிஸா – ருஷ்ய நாடோடிக் கதைகள்
• பேரழகி வசிலிஸா – அழகிய படங்களுடன்
• பிற நாடோடிக் கதைகள்

யா.பெரெல்மான் (Y.PERELMAN):

யாகொவ் இஸிட்ரொவிச் பெரெல்மான் சிறுவர்களுக்கெனப் பல அறிவியல் புத்தகங்களை அவர்களும், நாமும் எளிதில் புரிந்து கொள்ளும் வகையில் எழுதியுள்ளார்.

வெறும் பாடப் புத்தகம் போல் அல்லாமல் பல சுவாரசியமானத் துனுக்குகளையும், புதிர்களையும் இணைத்து அவை தோன்றிய விதம் குறித்தும் கூட எழுதியுள்ளார்!

உலகப் புகழ் பெற்ற 15 வில்லைப் புதிர் பற்றிய இவரது புதிர்கள் நம்மை ஆச்சரியத்தில் ஆழ்த்துகின்றன! இதையும் ரூபிக்ஸ் க்யூப்பையும் சிறுவயதில் நாம் பலூன்காரனிடம் வாங்கி விளையாடத் தெரியாமல் விளையாடினோமே, ஞாபகமிருக்கிறதா?

அதியற்புத ஓவியங்களும் இப்புத்தகத்தில் உண்டு! இப்படியெல்லாம் பாடப் புத்தகம் நமக்கிருந்தால் படிப்பு என்பது ஒரு சுகானுபவமாகவே இருக்கும்!

புத்தகம்	:	விளையாட்டு கனிதம்
ஆசிரியர்	:	யா.பெரெல்மான்
பதிப்பாளர்கள்	:	முன்னேற்றப் பதிப்பகம், மாஸ்கோ (PROGRESS PUBLISHERS)
வருடம்	:	1977
ஆங்கிலத்தில்	:	அ.ஷ்காரொவ்ஸ்கி(A.SHKAROVSKY)
தமிழில்	:	ரா.கிருஷ்ணையா
ஓவியர்	:	யெ.தாரோன், வி.கொரல்கோவ்
விற்பனையாளர்கள்	:	நியூ செஞ்சுரி புக் ஹவுஸ் பிரைவேட் லிமிடெட், சென்னை

இவரது புத்தகமொன்றைப் படித்துப் பார்க்க ஆர்வ்மிருந்தால் கீழேயுள்ள சுட்டியைப் பயன்படுத்தவும்!

• PHYSICS FOR ENTERTAINMENT

ருஷ்யப் புரட்சி வரலாறு:

இப்புத்தகத்தைப் பற்றி நண்பர் ஷிவ் ஏற்கெனவே பதிவிட்டுள்ளார். படிக்க இங்கே ‘க்ளிக்’கவும்

இருப்பினும் அவர் NCBH நிறுவனம் செய்த மறுபதிப்பு பற்றியே பதிவிட்டார். என்னிடம் இப்புத்தகத்தின் ஒரிஜினல் முன்னேற்றப் பதிப்பகம் (PROGRESS PUBLISHERS, MOSCOW) வெளியிட்ட பதிப்பு அட்டையில்லாமல் இருக்கிறது!

இரண்டையும் பார்த்த போது பழைய பதிப்பில் எழுத்துக்கள் கையால் எழுதப்பட்டும், மறுபதிப்பில் அவை கணினி எழுத்துக்களால் நிரப்பப்பட்டும் இருப்பதைக் கண்டேன்!

என்னதான் கணினி எழுத்துக்கள் சிறப்பாக இருந்தாலும், கையெழுத்தில் இருக்கும் ஒரு உணர்வு கணினி எழுத்துக்களில் காமிக்ஸ் படிக்கும் போது கிடைப்பதில்லை என்பதே உண்மை!

இதோ நீங்களும் பாருங்கள்! வித்தியாசம் தெரியும்!

முன்னேற்றப் பதிப்பகம், 1988

NCBH, ஜனவரி 2008

புத்தகம்	:	ருஷ்யப் புரட்சி (THE RUSSIAN REVOLUTION: WHAT ACTUALLY HAPPENED?)
ஆசிரியர்	:	எ.தப்ரவோல்ஸ்கயா, யூ.மக்காரவ்
பதிப்பாளர்கள்	:	முன்னேற்றப் பதிப்பகம், மாஸ்கோ (PROGRESS PUBLISHERS)
வருடம்	:	1988
தமிழில்	:	த.ஜெயகாந்தன்
ஓவியர்	:	யெ.தாரோன், வி.கொரல்கோவ்
எழுத்துக் கலைஞர்	:	ஓ.வெச்சேரினா
விற்பனையாளர்கள்	:	நியூ செஞ்சுரி புக் ஹவுஸ் பிரைவேட் லிமிடெட், சென்னை

பிற கதைகள்:

எனக்குப் பிடித்த இன்னும் சிலபல ருஷ்ய சிறுவர் புத்தகங்கள்!

இவற்றில் வோவா மற்றும் HAPPY DAYS எனக்கு ஸ்பெஷலாகப் பிடிக்கும்! மாஷா-வில் இருக்கும் சித்திரங்கள் அதியற்புதமாக இருக்கும்!

பதிப்பகங்கள்:

இப்பதிவில் இரு பதிப்பகங்களின் பெயர்கள் அடிக்கடி காணப்படும்! அவை இப்புத்தகங்களை தரமாகப் பல்வேறு மொழிகளிலும் அச்சிட்ட முன்னேற்றப் பதிப்பகம், மாஸ்கோ (PROGRESS PUBLISHERS) மற்றும் இந்தியாவில் இப்புத்தகங்களை மலிவு விலையில் விற்பனை செய்த நியூ செஞ்சுரி புக் ஹவுஸ், சென்னை (NEW CENTURY BOOK HOUSE) ஆகியவையே!

இவ்விரு பதிப்பகங்களின் மூலம் பல புத்தகங்களை உயர்ந்த தரத்தில், மலிவு விலையில், தமிழில் நாம் நமது சிறு வயதில் படிக்க முடிந்தது! இவை இன்னும் கூட NCBH-ன் கிளைகளில் கிடைக்கின்றன! புத்தகக் கண்காட்சிகளிலும் இந்தப் புத்தகங்கள் காணக் கிடைக்கலாம்!

உலகமயமாக்கலுக்குப்பின் வந்த அமெரிக்கப் பதிப்பாளர்களின் தரமற்ற, விலையுயர்ந்த, வணிக நோக்கம் மட்டுமே கொண்ட புத்தகங்களினால் இவற்றின் மவுசு குறைந்தாலும் நம் நெஞ்சங்களில் எந்நாளும் நீங்கா இடம் பெற்றிருக்கும்!

பதிவை இவ்வளவு தூரம் பொறுமையாகப் படித்ததற்கு எனது நன்றிகள்! உங்கள் கருத்துக்களை மறவாமல் பின்னூட்டங்களாகப் பகிர்ந்து கொள்ளுங்கள்.

இப்போதைக்கு அவ்வளோதான்,
மீண்டும் சந்திப்போம்!

பி.கு.:-

• இப்பதிவு ஒரு ONE-OFF முயற்சியே! இதனால் நான் ஏதோ அய்யம்பாளையத்தார்-க்கு போட்டியாகக் கிளம்பிவிட்டேன் என யாரும் எண்ண வேண்டாம்! என்னிடம் உள்ள சரக்கு மிகவும் குறைவு (இன்னும் ஒரு பதிவுதான் இது மாதிரி போடலாம்)! அவரோ சிறுவர் இலக்கிய சிந்தனைச் சிற்பி! நானோ சிங்கிள் டீக்கே சிங்கியடிப்பவன்! அவரோ கடல்! நானோ வெறும் கானல் நீர் (இந்தக் கானல் நீர் அல்ல)!
• மேற்குறிப்பிட்டுள்ள கவுண்டரின் ‘பன்ச்’ காமெடிக்காக மட்டுமே! தயவு செய்து யாரும் சீரியஸாக எடுத்துக் கொள்ள வேண்டாம்! தனது படங்களில் அனைத்துத் தரப்புத் தொழிலாளர்களின் வாழ்வியல்களையும் பிரதிபலித்த ஒரே கலைஞர் கவுண்டர்தான் என்பது என் கருத்து!

தொடர்புடைய இடுகைகள்:-

நண்பர் சிவ்-வின் சித்திரக்கதை வலைப்பூவில் ருஷ்யப் புரட்சி வரலாறு பற்றியப் பதிவு!

• http://comicstamil.blogspot.com/2009/03/blog-post.html